MEDIASHON
Mediashon ta un proseso, a traves di lo kual partidonan ku tin diferensia di opinion ku otro ta purba ku yudansa di un mediadó pa yega na un akuerdo final. En prinsipio, por intermediá den kualkier tipo di konflikto. Un konflikto na nivel familiar, por ehempel, konflikto entre kompaníanan, konflikto riba tereno laboral, konflikto entre entidatnan privá. Un instansia.di mediashon ta brinda e partidonan konserní e oportunidat di sinta na mesa dialogá i deliberá i haña otro pa asina resolvé nan konfliktonan. Mediashon ta tumando lugar ku mas frekuensia na Antia Hulandés i Aruba, pa motibu ku e aparato hudisial ta sumamente okupá. Mediashon a drenta na vigor dia 1 ougùstùs di aña 2005, desde e introdukshón di e Kódigo Sivil nobo di Antia Hulandés i Aruba pa ta mas konkreto. Mediashón ta enserá ku e aparato hudisial, na e momento ku e prosedura ta tumando lugar, por solisitá e intervenshón di un mediadó pa asina e partidonan konserní por haña otro i resolvé na diferensianan di opinión. Un gran bentaha di mediashon ta ku por regla general e gastonan korrespondiente ta mas rasonabel ku den un prosedura penal. Un prosedura penal tin biaha por resultá nèt kontrario di lo kual a wòrdu antisipá. E partidonan konserní no forsosamente ta yega na un akuerdo, e konflikto por òf ta eskalá, i e yegada na e solushon efektivo ta bira un kaminda di krus. E partidonan konserní semper kier yega na un solushon, pero den hopi kaso na no ta logra sin e asistensia profeshonal di un mediadó. Nos mediadónan por asistí Bo pa yega na un solushon satisfaktorio pa ambos partido. Dor di skucha e motibonan di deskòrdia di ambos partido, aportá konsehonan konstruktivo na e diskushon, nos mediadónan por resolvé e desakuerdo ku un solushon rápido i efikas. Mester agregá tambe ku e puntonan di salida pa solushon den Bo kaso ta basá ariba ekspertisio, imparsialidat, koutela i integridat. Pa ken mediashon ta útil? - Mediashón ta útil tantu pa entidatnan/personanan privá komo kompaníanan. - Mediashon ta e aporte di ekspertisio útil na e kaso, den kual nos mester di otro pa por solushone'le. Bentaha di Mediashón: - Mediashón ta relativamente mas ekonómiko ku un prosedura huridiko. - Mediashón ta ofresé un solushón sin e preshón di un prosedura. - Mediashon por wòrdu apliká den tur tipo di kaso. Por tuma kontakto libremente ku un di nos mediadónan, sea kual sea e fase di e disputa. Es desir, por ta masha bon a hasi un esfuerso kaba pa dialogá òf e problema a eskalá. No ta importá. Djis tuma kontakto ku nos mediadónan. E mediadó, segun Bo indikashonan,lo deliberá e posibilidatnan ku tur esnan envolví pa traha un komienso pa buska un solushón satisfaktorio pa e kaso. Pa mas informashon, por fabor tuma kontakto direktamente ku e ofisina di Bokkes Fontein Advocaten' via number di telefon: +5999 465 82 98 òf via e-mail: info@bfadvocaten.com